དགའ་ལྡན་རི་བོའི་རྩེ་ནས་ཨ་མ་དྲན་མྱོང་བའི་བླ་མ་ཙོང་ཁ་པ། འཆི་མེད་ཀྱིས་བརྩམས།

དགའ་ལྡན་རི་བོའི་རྩེ་ནས་ཨ་མ་དྲན་མྱོང་བའི་བླ་མ་ཙོང་ཁ་པ།

འཆི་མེད་ཀྱིས་བརྩམས།
སྐལ་བཟང་སྒྲོལ་མས་གྱེར།

ཐེངས་དང་པོར། འབྲོག་རི་དགའ་ལྡན་དགོན་པར་མཇལ་དུས།
རང་ཚོད་ཀྱི་རྟེན་འབྲེལ་གྱིས།
ཐོག་མར་སྒྲུབ་ཕུག་མཇལ།
ངས་ཨ་མར་མཇལ་མ་ཐུབ་པའི་བླ་མ་ཁྱེད་རང་དྲན།

དབྱར་དགུན་གྱི་ས་སྲོད་དང་ཞོགས་པ་རེ་རེའི་ཁྱེད་ཀྱི་དྲན་གདུང་གིས།
ནགས་མའི་ཀློང་གི་ཁུ་བྱུག་ཚོགས་ཀྱི་གསུང་སྐད་འགགས།

ཨ་མ་ཤིང་བཟའ་ཨ་ཆོས་མས།
བུ་ཁྱེད་ལྟོགས་ཀྱི་ཨེ་ཡོད། བུ་ཁྱེད་གྲང་གི་ལོས་ཡོད།
བུ་ཁྱེད་ཀྱིས་དཀའ་ཡི་ཡོད་དམ་བསམ་ཡོད་སྲིད།

ཨ་མ་ཤིང་བཟའ་ཨ་ཆོས་མས།
ཟས་ཞིམ་པོ་ཟ་དུས་ཁྱེད་རང་དྲན་ཡོད་ངེས།
གོས་ཡག་པ་མཐོང་ན་ཁྱེད་རང་དྲན་ཡོད་ངེས།
ཁྱེད་ཀྱི་ཁ་ཡ་ན་ཟླ་རིག་ན་ཁྱེད་རང་དྲན་ཡོད་ངེས།
ཁྱེད་རང་བྱིས་དུས་ཀྱི་རྩེད་ཆས་དང་ལྭ་ལྭ་མཐོང་ན་ལྷག་ཏུ་ཁྱེད་རང་དྲན་ཡོད་ངེས།

་་་ ་་་
རེག་རེག་བྱས་ཡོད་ངེས།
བྲང་ལ་སྦྱར་ཡོད་ངེས།
ཉིན་རེར་ལན་རེ་བལྟས་ཡོད་ངེས།
ཁྱེད་རང་གམ་ན་ཡོད་སྣང་གིས། གཅེས་གཅེས་བྱས་ཡོད་ངེས།
ཁྱེད་རང་མཆི་མས་དྲངས་ཏེ། མིག་ནས་བཞུར་ཡོད་ངེས།

ཨ་མ་ཤིང་བཟའ་ཨ་ཆོས་མས།
ཁྱེད་ལ་འཕྲད་འདོད་ཀྱིས། རང་གི་རུས་པ་རང་གིས་བསྡམས་ཡོད་ངེས།
ཁྱེད་ལ་འཕྲད་འདོད་ཀྱིས། རང་གི་ཤི་གསོན་གྱི་ལམ་སྣེ་ཁྱེད་ལ་གཏད་ཡོད་ངེས།
ཉི་ནུབ་རེ་རེ་མཆི་མས་བསྐྱལ་ཏེ། ཞོགས་པ་རེ་རེ་དངན་པས་བསུས་ཡོད་ངེས།
མདོར་ན།
ཨ་མའི་མི་ཚེ་གཅིག་གི་སྨོན་ལམ་ཧྲིལ་བོའི་ནང་དུ།
བུ་ཆུང་ཁྱེད་རང་མ་གཏོགས་སུ་ཡང་ཤོང་མེད་ངེས།

ཁྱེད་ལ་ཕྲད་པའི་རྨི་ལམ་བཏང་ཡོད་ངེས།
ཁྱེད་ལ་འཕྲད་སྲིད་པའི་ཡིད་ཆེས་བཅངས་ཡོད་ངེས།

ལོ་ན་ཚོད་ཀྱིས་འདེད་དུས། བུ་ཁྱེད་དང་འཕྲད་མ་ཐུབ་སྙམ་པས།
མགོ་བོ་སྔས་ལ་འབྱར་ཡོད་ངེས།
ཕྱི་མིག་ཁྱེད་ལ་བསྐྱུར་ཡོད་ངེས།
ཨ་མ་ཤིང་བཟའ་ཨ་ཆོས་མའི་མི་ཚེ་དེ་ལྟར་དྲུབས་ཡོད་ངེས།

འཇིག་རྟེན་གནམ་འོག་གི་ཨ་མ་ཐམས་ཅད་ཀྱི་སྐྱིད་སྡུག་གཅིག་ཡིན་ན།
ངས་ཀྱང་ཨ་མ་ཞིག་གི་དྲན་གདུང་ཁུར་ཏེ་ཁྱེད་ལ་མཇལ་ཡོད།
ངས་ཀྱང་།
མ་ཤི་གསོན་བྲལ་གྱི་སྡུག་བསྔལ་ལག་པས་བཏེགས་ཏེ་ཁྱེད་ལ་ཕུལ་ཡོད།

ཨ་མས་བུ་ཆུང་དྲན་པའི་སྡུག་བསྔལ།
ཨ་མ་ཤིང་བཟའ་ཨ་ཆོས་མའི་ཚབ་ཏུ་ཁྱེད་ལ་ཕུལ་ཡོད།

https://mp.weixin.qq.com/s/fFgMZSri9-uwvi9dRx7OAA