འོད་ཟེར། ཉག་རོང་གི་མགོན་པོ་རྣམ་རྒྱལ།

ཤིན་ལུང་ཟེར་བའི་ས་ཆ་དེར་བོད་སྐད་ཐོག་འབོད་སྲོལ་གཉིས་ཡོད་པའི་ནང་ནས་གཅིག་ལ་ཉག་རོང་ཟེར་འབོད་ཀྱི་ཡོད། དེའི་གོ་དོན་ནི་ནགས་གསེབ་ཁྲོད་ཀྱི་རོང་ས་ཟེར་ཡིན་ཞིང་། མིང་གཞན་ཞིག་ལ་ལྕགས་མདུད་ཟེར་འབོད་སྲོལ་ཡོད་པ་དེ་ས་གནས་འདིའི་སྐད་གྲགས་ཡོད་པའི་བླ་ཆེན་ཞིག་དང་འབྲེལ་བ་ཡོད་པ་རེད། ཡང་ཉག་རོང་ཟེར་འབོད་སྲོལ་ཡོད་པ་འདི་བོད་པའི་ནང་དེ་བས་ཡོངས་ཁྱབ་ཆགས་ཡོད། དེ་མིན་ཡང་རྒྱ་སྐད་ཐོག་འབོད་སྲོལ་ཁག་གཉིས་ཡོད་པ་སྟེ། གཅིག་ལ་ཀྲན་ཧྰ་ཟེར་འབོད་ཀྱི་ཡོད་པ་དང་། དེ་རྒྱ་ནག་མི་སེར་རྒྱལ་ཁབ་ཀྱི་དུས་ཚོད་དེའི་འགོ་སྟོད་ལ་བྱུང་བ་ཞིག་ཡིན་ཞིང་། གོ་དོན་ནི་ལྕགས་མདུད་རྒྱ་མིར་འགྱུར་བར་རྟོགས་ཀྱི་འདུག མིང་གཞན་ཞིག་ནི་ཤིན་ལུང་ཟེར་བ་དེ་ཡིན་པས་སྤྱི་ལོ་༡༩༥༡ལོར་བསྒྱུར་བ་བཏང་བ་ཞིག་རེད། ཤུགས་བསྟན་དུ་གོ་དོན་ནི་འབྲུག་ལ་སྐྱེ་བ་གསར་པ་ཐོབ་པ་ཟེར་བ་དེ་ཡིན་པས། གསལ་པོར་མཐོང་ཐུབ་རྒྱུར། མིང་དེ་གཉིས་ཀར་མི་སེར་སྤེལ་ཡུལ་གྱི་རྣམ་པ་ཞིག་ལྡན་ཡོད།

གུས་མོ་ཁམས་ཁུལ་དུ་ལོ་མང་འཚོ་བ་བསྐྱལ་མྱོང་ཡོད་པས་ཁམས་ཀྱི་བྱང་རྒྱུད་དང་ལྷོ་རྒྱུད་ཀྱི་ས་ཆ་མང་པོར་འགྲོ་མྱོང་། འོན་ཀྱང་ཉག་རོང་དུ་སྐྱོད་མྱོང་མེད་པ་དེ་ཕལ་ཆེར་ལམ་ཞོར་འཁེལ་མྱོང་མེད་པས་རེད། ས་ཆ་དེར་མི་རིགས་ཀྱི་ཉམས་འགྱུར་དཔའ་ངར་ཆེ་བར་གྲགས་པ་དང་། དེ་བས་སྨྱོ་བ་ལྟར་ཆོས་ལུགས་ཐོག་སྒོམ་པ་ཉམས་ལེན་བྱས་པ་ནས་སྙན་གྲགས་བྱུང་བ་དེ་གུས་མོས་ཤེས་ཀྱི་ཡོད། ལོ་ཞིག་གི་དགུན་དུས་གུས་མོས་ལྷ་ལྡན་གཙུག་ལག་ཁང་ནང་ཉག་རོང་ནས་རྐྱང་ཕྱག་ཕུལ་ཏེ་ལྷ་སར་འབྱོར་བའི་དགེ་འདུན་པ་གཉིས་ཀྱིས་ཇོ་བོ་རིན་པོ་ཆེའི་སྐུ་མདུན་དུ་མར་ཁུས་ཁེངས་ནས་ཡོད་པའི་རས་མཐེ་པོར་གཡོགས་ནས་མཆོད་མེ་ཕུལ་བ་ངས་མཇལ་མྱོང་ཡོད། མཛུབ་མོས་མཆོད་མེ་ཕུལ་བ་ནི་གནའ་སྔ་མོའི་གཏམ་རྒྱུད་ནང་ཡོད་པའི་དཀའ་ཐུབ་སྤྱོད་སྟངས་ཤིག་ཡིན་པས་མཐར་ཕྱིན་པའི་དད་སེམས་ཤིག་མཚོན་པར་བྱེད་ཀྱི་ཡོད།

ང་ཚོ་མོ་ཊ་བཏང་སྟེ་དཀར་མཛེས་ནས་ཁ་བྲལ་བའི་སྐབས་དེར་གཙང་ཆུའི་འགྲམ་ནས་མོ་ཊ་བཏང་སྟེ་ཉག་རོང་དུ་སྐྱོད་བར་ཕལ་ཆེར་ཆུ་ཚོད་ལྔ་དྲུག་ཙམ་འགོར་སོང་། ལམ་བར་དུ་རི་མཐོན་པའི་སྟེང་ལྗང་ཐིང་ཐིང་མཐོང་རྒྱུ་ཡོད་ན་ཡང་མང་ཆེ་བ་ནགས་ཤིང་ཐ་རེ་ཐོ་རེ་ལས་མི་འདུག་ལ། ཐ་ན་གང་བྱུང་གིས་ཤིང་སྣ་གཅོད་པའི་ཤུལ་མངོན་གསལ་དོད་པ་དང་། ས་ལ་ལྷུང་བའི་ཤིང་ལྡོང་རེ་རེ་བཞིན་རི་འདེབས་སུ་འཐོར་ནས་འདུག ལྷག་པར་དུ་ཞེད་སྣང་དངངས་སྐྲག་བྱུང་བ་ནི་རི་ལམ་གསར་བཟོ་བྱས་པ་དེས་ས་ཆུ་ཤོར་བ་དང་། མཐོང་སྣང་མི་འདོད་པའི་རྨ་ཤུལ་ལྷེབ་ལྷེབ་དེ་ཚོ་དམར་རྗེན་དུ་ས་ངོས་ལ་ཐོན་ནས་འདུག་པས། རི་ལམ་དེ་ཚོ་མང་ཆེ་བ་གཏེར་ཁ་དབོར་འདྲེན་ཆེད་བེད་སྤྱོད་བྱས་ཡོད་པ་རྗེས་ལ་ཤེས་རྟོགས་བྱུང་། རིམ་པས་རྫོང་གྲོང་དང་ཐག་ཉེ་རུ་འགྲོ་སྐབས་གཅིག་གྱུར་གྱི་བཟོ་ལྟ་གཅིག་པའི་བོད་བཟོའི་སྡོད་ཁྱིམ་སྟར་པ་བཞིན་མཐོང་རྒྱུ་འདུག་ལ། ཁང་པའི་ཐོག་སྟེང་ཚང་མར་ཚོན་མདོག་དམར་རྐྱང་དང་ཡང་ན་སྔོ་རྐྱང་བཟོས་འདུག་པས་ཕལ་ཆེར་འདིར་སྤྱི་ཚོགས་རིང་ལུགས་ཀྱི་གྲོང་གསེབ་གསར་པ་ཟེར་བའི་ནུས་པ་ཐོན་གྱི་ཡོད་ས་རེད།

རྫོང་གྲོང་ཧ་ཅང་ཆུང་ཆུང་དང་། ཁྲོམ་གཞུང་གསུམ་ལས་མི་འདུག འོན་ཀྱང་འགྲུལ་ཁང་ཡོངས་རྫོགས་ཁེངས་པ་དང་། ཚང་མ་ཡུལ་སྐོར་བ་རེད་འདུག ད་ཆ་བོད་ལ་ཡུལ་སྐོར་དུ་ཡོང་མཁན་མང་ཆེ་བ་རྒྱ་ནག་གི་མི་ཡིན་ཞིང་། དེ་མ་ཚད་ཟླ་བ་གསུམ་པ་ནས་བཟུང་དཔེར་ན་ཟི་ཁྲོན་ཁོངས་ཀྱི་བོད་ཀྱི་ས་ཁུལ་ནང་ཕྱི་རྒྱལ་མི་སྣ་ཡུལ་སྐོར་དུ་སྐྱོད་རྒྱུའི་སྒོ་བརྒྱབ་ཡོད། ང་ཚོར་ས་གནས་བོད་མིས་གཉེར་བའི་མགྲོན་ཁང་ཞིག་རྙེད་བྱུང་བ་དང་། དེ་རྗེས་ཁྲོམ་གཞུང་ལ་སྐོར་ར་བརྒྱབ་པར་ཕྱིན་པ་ཡིན། གྲོང་ཁྱེར་ནང་རྒྱུགས་ནས་ཡོད་པའི་ཆུ་བོའི་སྟེང་ཟམ་པ་ཞིག་ཡོད་པ་དེས་ཉེ་ཆར་དྲ་རྒྱའི་ཐོག་ནས་མཐོང་བའི་འདྲ་པར་ཞིག་གུས་མོས་དྲན་བྱུང་བ་སྟེ། ལོ་གཞོན་གཞོན་གྱི་བོད་མི་གསུམ་གྱིས་ཏག་ཏག་ཟམ་པ་འདི་བརྒྱུད་གོམ་བགྲོད་བྱེད་བཞིན་བསྒྲགས་ཡིག་གཏོར་བ་དང་། འབོད་ཚིག་སྒྲོག་ནས་འདུག ཁོང་ཚོ་འཛིན་བཟུང་བྱས་ཡོད་པ་ངེས་པ་རེད། ཡིན་ནའི་ཁོང་ཚོར་ཁྲིམས་བཅད་ལོ་ཚད་ག་ཚོད་བཏང་མིན་མ་ཤེས།

གུས་མོས་ད་དུང་ཉག་རོང་གི་སྐད་གྲགས་ཡོད་པའི་མི་སྣ་ངོ་མཚར་ཅན་མགོན་པོ་རྣམ་རྒྱལ་དྲན་བྱུང་། ཐ་ན་ཁོང་ནི་ལོ་ངོ་བརྒྱ་ལྷག་ཙམ་སྔོན་གྱི་དཔའ་རྒོད་ཞིག་ཡིན་པས། ཉེ་འཁོར་གྱི་སྡེ་པའི་འགོ་པ་དང་ཡུལ་དཔོན་མང་པོར་འཕྲོག་བཅོམ་བྱས་པ་མ་ཟད། ད་དུང་རང་ཉིད་ཀྱི་ཕ་བསོད་མཁན་གྱི་ཆིང་སྲིད་གཞུང་ལ་དམག་བརྒྱབ་མྱོང་ཡོད་ལ། ཐ་ན་ལྷ་སའི་བཀའ་ཤག་གཞུང་ལ་ཡང་དམག་བརྒྱབ་མྱོང་ཡོད་པ་རེད། ཁྱད་མཚར་བ་ཞིག་ལ། ཁོང་གིས་དེ་སྔ་སྨྱོ་གཏམ་བརྗོད་པར་ལྷ་ས་བར་དམག་བརྒྱབ་སྟེ་གཙུག་ལག་ཁང་གི་ཇོ་བོ་རིན་པོ་ཆེའི་སྐུ་འདྲ་འཕྲོག་ནས་ཉག་རོང་དུ་གདན་འདྲེན་ཞུས་ཏེ་བསྙེན་བཀུར་ཞུ་རྒྱུ་དང་། དེ་ནས་བཟུང་བོད་ས་ཡོངས་ཀྱི་དད་ལྡན་པ་ཚོ་ལྷ་ས་བར་སྐུ་ཕྱག་ཕུལ་ཏེ་སྐྱོད་དགོས་དོན་མེད་པར་ལམ་བསྒྱུར་ནས་ཁོང་གི་ཕ་ཡུལ་དུ་གནས་མཇལ་ལ་འགྲོ་ཐུབ་པ་བཟོ་རྒྱུ་ཡིན་པ་བརྗོད་ཡོད།

མགོན་པོ་རྣམ་རྒྱལ་ཁོང་ནི་དངོས་གནས་བྱས་ན་ཕྱུག་པོའི་ཁྱིམ་ཚང་གི་འགོ་པར་སྐྱེས་ཤིང་། ས་ཆ་བཙན་འཕྲོག་བྱེད་མཁན་གྱི་འཇག་པ་ཞིག་རེད། ཡིན་ནའི་རྒྱ་ནག་གུང་བྲན་གཞུང་གིས་མང་ཚོགས་ཀྱི་བསམ་འདུན་དང་མཐུན་པ་ཟེར་བ་དང་། གང་དུ་དྲག་གནོན་ཡོད་ན་དེར་ངོ་རྒོལ་ཡོད་ཟེར་བའི་ཞིང་པའི་འོས་ལངས་ཀྱི་དཔའ་བོ་ཞིག་ཏུ་བརྗོད་ཀྱི་ཡོད། དེ་ཡང་རྒྱ་ནག་གི་ལོ་རྒྱུས་ཐོག་རྫོགས་མཐའ་མེད་པར་ཐོན་པའི་chen sheng དང་ wuguang ཟེར་བའི་མི་དེ་ཚོ་དང་གཅིག་པ་རེད། དྲིལ་བསྒྲགས་ཀྱི་རྩོམ་ཡིག་འགའ་ཤས་ནང་ཁོང་གིས་ཡུལ་གྱི་ལག་དམར་གཤེད་མ་ཟེར་བ་གང་འདྲ་བྱས་ནས་བཅོམ་པ་དང་གང་འདྲ་བྱས་ཏེ་ས་ཞིང་བགོས་པ་སོགས་བྲིས་ཡོད་ལ། གང་འདྲ་བྱས་ནས་མང་ཚོགས་ཀྱི་བློ་འགུག་ཐུབ་པ་བྱས་ཏེ་ས་གནས་ཁག་ལ་ཤུགས་རྐྱེན་ཇི་འདྲ་བྱུང་མིན་སོགས་བྲིས་ཡོད་པས། མི་དམངས་འགོ་ཁྲིད་བྱས་ཏེ་བཅིངས་འགྲོལ་ཐོབ་པ་ཟེར་བའི་གུང་བྲན་ཚོགས་མི་ཞིག་ལ་མ་རྩིས་ཙམ་བྱས་ཡོད།

འདི་ལྟར་བྱ་དོན་གང་ཡིན་ནམ། དོན་དངོས་ཐོག་རྒྱུ་མཚན་ནི་བོད་མིའི་ལོ་རྒྱུས་ཐོག་ཞིང་པའི་འོས་ལངས་ཧ་ལམ་ཐོན་མྱོང་མེད་པས། ཡང་དེ་ནི་རྒྱ་ནག་གུང་བྲན་གཞུང་གིས་སྲོལ་རྒྱུན་གྱི་བོད་འདིར་ཆེས་མུན་ནག་ཟེར་བའི་ཞིང་བྲན་སྤྱི་ཚོགས་གྱི་མཚན་ཉིད་དེ་དང་མཐུན་གྱི་མེད་པས་རེད། དེར་བརྟེན་རྒྱ་ནག་གུང་བྲན་གཞུང་གིས་རིན་ཐང་བྲལ་བའི་ནོར་བུ་རྙེད་པ་བཞིན་མགོན་པོ་རྣམ་རྒྱལ་ལ་ཞིང་པའི་འོས་ལངས་ཀྱི་དཔའ་བོ་ཟེར་བའི་གཟི་བརྗིད་ལྡན་པའི་ཞྭ་མོ་འདི་གཡོགས་ཏེ་རྒྱ་ཁྱབ་ཀྱིས་བསྟོད་ར་བྱས་ཡོད། ད་ཆ་ཉག་རོང་དུ་བུ་ལོང་མའི་མཁར་རྫོང་གི་རྗེས་ཤུལ་ཟེར་བ་ཡོད་པ་མ་ཟད། ཐ་ན་རྫོང་སྲིད་གཞུང་གི་མགྲོན་ཁང་གི་མིང་ལ་ཡང་བུ་ལོང་མའི་གསོལ་མགྲོན་ཆེན་པོ་ཟེར་བསྒྱུར་བ་བཏང་ཡོད། ཡང་བུ་ལོང་མ་ཟེར་བ་ནི་མགོན་པོ་རྣམ་རྒྱལ་གྱི་མིང་འདོགས་ཡིན་ཞིང་། གོ་དོན་ནི་མིག་གཅིག་མ་ཟེར་ལོང་བ་ཡིན་པས་རེད།

10/06/2011ལྷ་ས་ནས།

གནས་ཚུལ་ཡོངས་ཁུངས http://www.sherab.org/?p=5164

This post is also available in: རྒྱ་སྐད , དབྱིན་ཇིའི་སྐད