འཇམ་དབྱངས་སྐྱིད། འདོགས་ཆ་དང་བུད་མེད་ཀྱི་འབྲེལ་བ།

2014 01 23 Women Jamyang Kyi

ཨ་མདོའི་རོང་ཕྱོགས་སུ་བུ་མོ་ཞིག་ལོ་བཅུ་དྲུག་བཅུ་བདུན་ལ་སླེབས་ནས་སྐྲ་ཕབ་ཀྱི་མཛད་སྒོ་བསྡུས་རྗེས་མི་དར་མར་གྱུར་པའི་མཚོན་རྟགས་སུ་སྐྲ་ལུང་འདོགས་པ་རེད། སྐྲ་ལུང་ནི་ཁྱོ་གའི“རྣམ་ཤེས”དང་སྟོབས་འབྱོར་མཚོན་བྱེད་ཀྱི་རྟགས་མཚན་ཡིན་པ་རེད། སྐྲ་ཕབ་ཚར་རྗེས་ད་གཟོད་བུ་མོ་གང་དེ་གནས་ལ་བསྐྱལ་ཆོག་པ་རེད། གཉེན་སྒྲིག་བྱས་རྗེས་སྐྲ་ལུང་དེ་ཁོ་མོ་ཚོའི་གྲིབ་མ་ནག་རིལ་བཞིན་ལུས་དང་ཁ་འབྲལ་མི་ཆོག་པ་རེད། བུད་མེད་ཚོས་བོད་ལྭ་གྱོན་རྗེས་རྒྱབ་སྟོང་དུ་བསྐྱུར་ནས་སྐྲ་ལུང་མ་བཏགས་པ་ཡིན་ན་གཞན་གྱིས་ཡུགས་སར་གྱུར་ཡོད་མེད་ལ་དོགས་པ་ཟ་བ་རེད། སྲོལ་རྒྱུན་དེའི་རྐྱེན་གྱིས་བུད་མེད་རྣམས་སྐྲ་ལུང་དང་ཁ་འབྲལ་དུས་ཞེད་སྣང་ཚ་པོ་སྐྱེ་གི་ཡོད་པ་རེད།

བདག་གི་ཨ་མ་ཡུན་རིང་ན་ཞིང་ལུས་མཚག་ཞན་པས་སྐྲ་ལུང་འདོགས་པར་སྟབས་མི་བདེ་བར་གྱུར། ངས་སྐྲ་ལུང་ལེན་པའི་སྐད་ཆ་ལབ་སྐབས་མོ་རང་བསམ་ཚུལ་དེར་མོས་མཐུན་ཆེན་པོ་འདུག་ན་ནའང་། ཞེད་སྣང་ཡ་མེད་ཅིག་ཀྱང་སྐྱེ་གི་འདུགཕྱིས་སུ་ཨ་མའི་ན་ཚ་ཇེ་སྡུག་ཇེ་ལོད་དུ་སོང་བ་དང་བསྟུན་མཚམས་ཤིག་སྐྲ་ལུང་ཡང་ཐེག་དཀའ་བར་གྱུར། དེ་བཞིན་ཨ་མས་སྐྲ་ལུང་རེས་ལེན་རེས་འདོགས་ཀྱི་གོ་རིམ་རིང་མོ་ཞིག་བརྒྱུད་མཐར་ངང་གིས་གོམས་ལོབས་སུ་སོང་།ཡིན་ཡང་། རང་གི་ཁྱོ་ག་གསོན་བཞིན་དུ་སྐྲ་ལུང་བླངས་པར་མོ་རང་དོགས་གཏན་ནས་བདེ་གི་མི་འདུགསྐབས་དེར་ཨ་ཕས་ཀྱང་ཨ་མར་སྐྲ་ལུང་བླངས་ཆོག་པའི་གནང་བ་སྩལ། ཞིང་གྲོང་གི་བུད་མེད་ཅིག་ལ་མཚོན་ན། གཞན་གྱི་སྐུལ་འདེད་དང་རང་ལ་སྤོབས་པ་ཅུང་ཟད་མེད་ཚེ། ཡུལ་སྲོལ་གོམས་འདྲིས་དེ་ལས་ཐོད་བརྒལ་བྱེད་རྒྱུ་ནི་ལས་སླ་མོ་ཞིག་མིན་པ་མཐོང་།

ལོ་བཅུ་ལྷག་གི་ཡར་སྔོན་ཞིག་ལ་ང་རང་ལྷ་སར་འབྱོར་སྐབས་ཏག་ཏག་དེ་གའི་བོད་མི་སྤུན་ཟླ་རྣམས་ཞོ་སྟོན་ལ་རོལ་གྱིན་པའི་སྒང་རེད། དེ་བས་ང་རང་ཡང་ནོར་བུ་གླིང་ག་རུ་སོང་ནས་བོད་ལྗོངས་བརྙན་འཕྲིན་ལས་ཁུངས་ཀྱི་ལས་བྱེད་མི་སྣ་སྐོར་ཞིག་དང་མཉམ་དུ་སྤྲོ་འཛོམས་བྱས་པ་ཡིན། སྐབས་དེར་ངས་ལྷ་སའི་གྱོན་ཆས་ཕུ་མེད་པང་གདན་མེད་པ་ཞིག་གྱོན་འདུག་པ་བུད་མེད་ལས་བྱེད་རེ་འགས་མཐོང་རྗེས། ཁྱོད་རང་ཆང་ས་བརྒྱབ་འདུག་གམ་ཞེས་དྲིས་བྱུང་། ངས་ང་རང་ཆང་ས་བརྒྱབ་པས་མི་ཚད་ཕྲུ་གུའང་ཡོད་པ་བཤད་རྗེས། ཁོ་མོ་ཚོ་ཡ་མཚར་བཞིན་འོ་ན་ཁྱོད་ཀྱིས་པང་གདན་མི་རྒྱག་པ་ཅི་ཡིན་ཞེས་དྲིས། ངས་ང་ཚོ་ཨ་མདོར་མཚོན་ན་དབུས་གཙང་གི་གྱོན་ཆས་ཕུ་མེད་འདི་དར་ནས་ལོ་མང་པོ་འགོར་མེད་ཅིང་། གྱོན་ཆས་འདིའི་གྱོན་སྲོལ་ཡང་གསལ་བོར་ཤེས་ཀྱི་མེད་ལ། ང་རང་པང་གདན་རྒྱག་པར་མི་ལོབས་པས་མ་བརྒྱབ་པ་ཡིན་ཞེས་ལན་བཏབ་པ་ན། ཁོ་མོ་ཚོས་ཡིད་སྨོན་དང་བཅས་སྐྱིད་པ་ལ་ཨང་ཟེར། ངས་ཁྱོད་ཚོ་པང་གདན་ལ་དགའ་པོ་མེད་ན་མ་རྒྱག་དང་ཞེས་པས། ཁོ་མོ་ཚོས་གཉེན་བསྒྲིགས་རྗེས་པང་གདན་མ་བརྒྱབ་པ་ཡིན་ན། མི་གཞན་གྱིས་ཡུགས་སར་བུད་ཡོད་མེད་ལ་དོགས་པ་སྐྱེ་ངེས་རེད་ཟེར། བཤད་པ་ལྟར་ན། པང་གདན་ནི་སྐྱེས་པའི་བླ་སྲོག་མཚོན་བྱེད་དུ་བརྩི་ཡི་ཡོད་པ་རེད། དེ་ཕལ་ཆེར་ང་ཚོ་ཨ་མདོའི་རོང་ཕྱོགས་ཀྱི་བུད་མེད་ཀྱི་སྐྲ་ལུང་དང་ཆ་འདྲ་བོ་འདུག ངས་པང་གདན་བརྒྱབ་མེད་པ་མཐོང་སྐབས་ཁོ་མོ་ཚོས་རྦད་དེ་ཡིད་སྨོན་འཆོར་གྱིན་པའི་སྣང་ཚུལ་དེར་གཞིགས་ན། བུད་མེད་ཚོ་པང་གདན་རྒྱག་རྒྱུར་དགའ་བ་མ་ཡིན་པར། རང་ཉིད་གཉེན་བསྒྲིགས་ཚར་བ་དང་ཡུགས་སར་གྱུར་མེད་པ་སོགས་ཀྱི་མཚོན་བྱེད་ཡིན་ཚོད་རེད། ཁོ་མོ་ཚོས་པང་གདན་རྒྱག་རྒྱུ་དེ་འགན་ཁུར་ཞིག་ཏུ་བརྩི་བ་ལས་རྒྱན་ཆས་ཤིག་ཏུ་བརྩི་ཡི་མེད་པ་རེད། མང་བཟའ་པད་དཀར་ལགས་ཀྱི་བརྩམས་ཆོས་ལས་བུད་མེད་ཀྱི་འདོགས་ཆ་མཚོན་རྟགས་རང་བཞིན་དུ་གྱུར་འདུག་པའི་སྐོར་གླེང་བ་གཤམ་གསལ་ལྟར། སྐྱེས་པ་ཚོར་མཚོན་ན། བུད་མེད་ལ་བསམ་བློ་ཡོད་པ་ལས་བུད་མེད་རྣམས་གསེར་དངུལ་གྱི་རྒྱན་ཆ་འདོགས་པ་དང་རྣམ་པ་ཇེ་མཛེས་སུ་གཏོང་བའི་སྒང་དུས་ཚོད་འདའ་བར་བློ་མོས་ཡོད་ཀྱི་འདུག ལོ་རྒྱུས་སྒང་བོད་ཀྱི་བུད་མེད་རྣམས་རྒྱུ་ནོར་དང་སྐྱེས་པའི་རྣམ་ཤེས་བཅོལ་ཡུལ་གྱི་མདོ་འཛིན་པར་གྱུར་ཡོད་ཚུལ་བཤད་ཀྱི་ཡོད་པ་དང་། གཉེན་བསྒྲིགས་རྗེས་དབུས་གཙང་དུ་པང་གདན་རྒྱག་པ་དང་ཁམས་ཁུལ་དུ་མགོར་སྤོས་ཤེལ་ལྔ་འདོགས་པ། ཨ་མདོར་དུང་རའམ་དམར་གདན། སྐྲ་ལུང་འདོགས་པ་སོགས་ཏེ། འདི་དག་གིས་བུད་མེད་དེར་བདག་པོ་ཡོད་ཟིན་པ་མཚོན་གྱི་ཡོད་པས། སྐབས་དེ་ཤེད་ནས་ཁོ་མོ་ཚོས་རྒྱན་ཆ་འདི་དག་ཁྱད་དུ་འཕགས་པར་ངོས་འཛིན་གྱིས་རང་ཉིད་ཀྱི་རྣམ་ཤེས་སམ་བླ་སྲོག་བོར་ཡོད་པའི་ཁར། མཚོན་བྱེད་རང་བཞིན་དུ་གྱུར་པའི་རྒྱན་ཆ་འདི་དག་གཉེན་བསྒྲིགས་རྗེས་ཀྱི་བུད་མེད་རྣམས་ཀྱི་འཚོ་བའི་ཁྲོད་ཀྱི་ལྕགས་སྒྲོག་ཏུའང་གྱུར་ཡོད་པ་རེད་ཅེས་བརྗོད་འདུག་པ་དངོས་གནས་རེད།

ལོ་མང་པོའི་སྔོན་ཞིག་ལ་ལས་ཀའི་ཆེད་དུ་གཉེན་བསྒྲིགས་ཟིན་པའི་ཁ་ཆེའི་བུད་མེད་གཉིས་དང་མཉམ་དུ་གྲོང་ཁྱེར་ག་གེ་མོ་ཞིག་ཏུ་སོང་བ་ཡིན། བུད་མེད་དེ་གཉིས་ཀྱིས་གཞི་རིམ་གྱི་རྫོང་ཞིག་གི་རིག་རྩལ་ལས་ཁུངས་སུ་ལས་ཀ་གཉེར་གྱི་འདུག ང་ཚོ་ཟླ་གཅིག་ལྷག་རིང་ལ་ཕན་ཚུན་ཁ་བརྡ་འབྲེལ་འདྲིས་བྱས་པ་ལས།ཁོ་མོ་གཉིས་ཀྱིས་ཁ་ཆེའི་བུད་མེད་ལ་གོ་ས་མེད་པར་འཁང་ར་དང་ལྷག་པར་དུ་གཉེན་བསྒྲིགས་རྗེས་བུད་མེད་ཀྱིས་ཞྭ་རས་ནག་པོ་གྱོན་དགོས་པའི་སྲོལ་དེར་གཏན་ནས་དགའ་གི་མེད་པ་ཤེས།དེའི་ཁྲོད་ཀྱི་བུད་མེད་ཅིག་གིས། མོས་ཁྱོ་ག་དང་ཁྱིམ་མིས་མི་མཐོང་སར་ཞྭ་རས་གཡུགས་ཏེ་རྒྱ་སྲང་ལ་གང་འདོད་དུ་ཉུལ་བ་ཡིན། ཁྱོ་གའི་མཐོང་ལམ་དང་ཡང་ཁྱོ་གའི་ཁྱིམ་མི་དང་འཕྲད་པར་འགྲོ་དུས་ཞྭ་རས་ངེས་པར་དུ་གྱོན་དགོས་པ་རེད་ཟེར། མོས་བཤད་ན། དེ་ནི་སེམས་པ་ཧ་ཅང་མི་སྐྱིད་པའི་དོན་དག་ཅིག་རེད་ཟེར། ཡིན་ནའང་སྲོལ་དེ་བཟློག་པའི་སྤོབས་པ་མེད་ཚོད་རེད། ཁོ་མོ་ཚོ་དང་ཁ་བརྡ་འབྲེལ་འདྲིས་མ་བྱས་སྔོན་ལ་ངའི་བསམ་པར་ཁ་ཆེའི་བུད་མེད་རྣམས་ཁྱོ་གའི་སྒྲིག་སྲོལ་བརྩི་སྲུང་དང་སྲོལ་རྒྱུན་གྱི་བཀག་སྡོམ་ལ་རྒྱབ་འགལ་མི་བྱེད་པར་འདོད་ཡོད། ཐེངས་དེར་ད་གཟོད་དེ་འདྲ་མིན་པ་ངས་གསལ་བོར་ཤེས་ཤིང་། སྲོལ་དེས་ཁོ་མོ་ཚོའི་སེམས་པ་སྡུག་གིས་མནར་བཞིན་པ་རྟོགས། དེ་ཡང་ལོས་ཡིན་ཏེ། བུད་མེད་ལ་ལན་བུ་སྐྲ་ལས་མཛེས་པའི་མགོ་རྒྱན་གང་ཙམ་ཡོད། རང་ཉིད་བུད་མེད་ཅིག་ཡིན་པའི་ཆ་ནས། བུད་མེད་ཀྱི་མཛེས་པ་འཇོམས་བྱེད་ཀྱི་གྱོན་ཆས་གང་ལའང་དགའ་པོ་གཏན་ནས་མེད།

ཕ་ཡུལ་རྒྱབ་ལ་བསྐྱུར་པའི་ཟླ་གཅིག་ལྷག་གི་རིང་ལ་ཁ་ཆེའི་བུད་མེད་དེ་གཉིས་སྲོལ་རྒྱུན་གྱི་བཀག་རྒྱ་ལས་རྣམ་པར་འགོངས་ཏེ་སེམས་ལྷོད་བག་དལ་གྱིས་སྤྲོ་སྐྱིད་ལོངས་སུ་སྤྱོད་པ་མཐོང་དུས།སྲོལ་རྒྱུན་གྱི་བཀག་རྒྱ་དམ་པོས་ཀྱང་བུད་མེད་ཀྱི་ལུས་ངག་ཡིད་གསུམ་གཅུན་ཐུབ་མེད་པ་ཚོར། ཁོ་མོ་གཉིས་རི་དྭགས་རྙི་ལས་ཤོར་བ་དང་འདྲ་བ་ནི། དུས་རྒྱུན་འཚོ་བའི་ཁྲོད་བུད་མེད་ལ་བཀག་རྒྱ་མང་བའི་རྐྱེན་ཨེ་ཡིན་ནམ་སྙམ། སྤྱིར་ནི་དེ་ནི་མི་སྒེར་གྱི་དོན་དག་ཅིག་ཡིན་པས་གླེང་དགོས་དོན་མེད་ནའང་། འདི་ནས་ངས་བཤད་འདོད་པ་ནི། མིའི་ལྷན་སྐྱེས་སུ་གྲུབ་པའི་འབྱུང་པ་གང་ཞིག་བཙན་དང་དབང་གིས་བཅོམ་བསམ་པ་དེ་ནི་མིའི་རང་གཤིས་ལ་གསལ་ཆ་མེད་པའི་རྟགས་རེད་ཟེར་བ་དེ་ཡིན།

ཁྱོ་གའི་ཆེད་དུ་གྱོན་ཆས་གང་རུང་མི་འདོད་བཙན་གྱིས་གྱོན་དགོས་པའི་སྲོལ་རྒྱུན་འདི་ལ། བུད་མེད་རྣམས་ཀྱིས་ལྐོག་ཏུ་མི་འདོད་པའི་སུན་སྣང་གི་རང་མདངས་སྟོན་གྱིན་པ་གོང་གི་དཔེ་མཚོན་དེ་དག་ལས་གསལ་རྗེན་དུ་བུད་འདུག མི་ནི་སྒེར་སེམས་ཅན་དང་རང་ཉིད་གཙོ་བོར་འཛིན་པའི་སྲོག་ཆགས་ཤིག་ཡིན་ལ། བུད་མེད་ཀྱང་དེ་ལས་འདའ་ཐབས་མེད་དོ། །

http://sangdhor.com/blog_c.asp?id=13307&a=menzhu

This post is also available in: དབྱིན་ཇིའི་སྐད