སྦི་རག་གི་རྦབ་ཆུ། རིན་སྤུངས་བསྟན་ཆོས།

2016 08 Waterfall of Beer

སྦི་རག་གི་རྦབ་ཆུ།

རིན་སྤུངས་བསྟན་ཆོས།

སྔོ་ཞིང་ལྗངས་པའི་སྤང་ཐང་།
དཀར་ཞིང་འཇམ་པའི་བུ་མོ།
སྙན་ཞིང་འཇེབས་པའི་གླུ་སྒྲ
བརྗིད་ཅིང་རྔམས་པའི་སྟག་ཤར།

ཨེ་མ།

དེ་ལས་ཀྱང་ཉམས་དགའ་བ་ནི།
མདུན་ཕྱོགས་ཀྱི་གླིང་ཁ་ཡངས་པོ་ན།
རི་ལྟར་རྩིགས་པའི་སྦི་རག་རེད།
ལྟོས་དང་།
སྦི་རག་གི་ལྦུ་བའི་རླབས་ཕྲེང་མཁའ་ལ་འཕྱོ་ཞིང་།
ཆང་ཞུའི་བུ་མོ་ནི། གཡོ་སྒྱུའི་ཝ་མོ།
རྨ་བྱའི་ཕྱི་རིས། ཁྱི་མོའི་མཇུག་མ།
མཛོ་ཡི་གྲོད་པ།
ཉོན་དང་། ཆང་མའི་གླུ་སྒྲ་གསལ་ཞིང་སྙན་འཇེབས་ལྡན་ལ།
ཆང་གཞས་གི་གླུ་དབྱངས་ནི་བོད་ཀྱི་གཞས།
ཀྲུང་གོའི་དབྱངས། ཕྱི་རྒྱལ་གཏམ།
རྒྱ་གར་གདངས།
ཀྱེ།

འདི་ནི་གང་བྱུང་གི་སྦི་རག་དཀྱུས་མ་ཞིག་མ་ཡིན་ཏེ།
དབུ་ཁྲིད་བསླུ་བའི་དོན། བླ་མ་འཇིགས་པའི་རྐྱེན།
གཞོན་ནུ་བརླགས་པའི་རྒྱུ། རྒན་པོ་ཉམས་པའི་གཉེན།
བུ་མོ་ཤོར་བའི་རིན།
འདི་ནི་བོད་གངས་ཅན་གཞོན་ནུ་རྣམས་ཀྱི་ལང་ཚོའི་སྦི་རག་རེད།
འདི་ནི་དུས་རབ་ཉེར་ཅིག་ལོ་རབས་སྟོང་ལོའི་བོད་རིགས་མི་དམངས་རྣམས་ཀྱི་འཚོ་གནས་ཀྱི་དགའ་ཚོར། གོ་གནས་ཀྱི་གཏའ་མ། འཐབ་འཛིངས་གི་རྒྱབ་ལངས། ལང་ཚོ་ཡི་དཔང་རྟགས།
ཀྱེ་ཀྱེ།

རྦབ་ཆུ་ཡི་སྦི་རག སྦི་རག་གི་རྦབ་ཆུ།
ཁྱེད་ལ་འཇིགས་པ་མེད་པའི་ཁྲོམ་རྭ་དང་། ཉམས་པ་མེད་པའི་ཚོང་ཤག
རྫོགས་རྒྱུ་མེད་པའི་ཐོན་རྗས། བསུན་རྒྱུ་མེད་པའི་བརྡ་ཁྱབ།
གཟི་རྒྱུ་མེད་པའི་སྐུ་མགྲོན་འདི་ལྟ་བུ་ཞིག་གང་ནས་བྱུང་བ་ཡིན།
རེད་ལགས།
དཔྱིད་གསུམ་ཕྱི་ནས་ཕེབས་པའི་གནས་སྐོར།
དབྱར་གསུམ་ས་ནས་རྡོལ་བའི་ཡུལ་སྐོར།
སྟོན་གསུམ་ལས་ཁུངས་ཁག་གི་སྣེ་ལེན།
དགུན་གསུམ་རྟེན་འབྲེལ་ཁག་གི་འགྲོ་སོང་།
གཞན་ཡང་།

ལྷ་ས། པེ་ཝུའི། ཞོལ་ཧ། ཧོན་ཏུང་། ཡིན་ཙེ་ཏན། གྲོ་ཆང་། ནས་ཆང་། མདོར་ན་ལྟག་སྒོ་རྒྱུ་བའི་ཆང་། དོན་འགྲུབ་པའི་ཆང་། དོན་རྐྱེན་བཟོ་བའི་ཆང་། བཟའ་ཚང་བྲལ་བའི་ཆང་ཏེ།
སྦི་རག་མི་གཅིག་བརྒྱ་དང་བརྒྱད། ཆང་སྣ་མི་གཅིག་ཁྲི་མ་འབུམ།
ཁྱེད་ནི་བློ་སྟོབས་རྒྱས་པའི་ཆུ་ཞིག་ཡིན་པས།
འཐབ་རྫིངས་གི་རྒྱལ་སྒོ་ཕྱེ་འཕོད་ལ།
ཁྱེད་ནི་བློ་རིགས་འཁྲུལ་བའི་ཆུ་ཞིག་ཡིན་པས།
གྲོགས་པོའི་བཟའ་ཟླ་ཡང་མཉམ་དུ་ཉལ་བར་སྤོབས།
ཁྱེད་ལ་གསར་བྱུང་གི་སྐུ་མགྲོན་བསྡུ་བའི་སྤོབས་པ་དང་ ལྡན་པས།
ཁྱེད་ཀྱི་མིག་རྒྱངས་རིང་ཤིང་བརྡ་ཁྱབ་མང་ལ་ ཁྱབ་ཤུགས་ཆེ།
ཁྱེད་ནི་གཟི་ཤུགས་ཆུང་ལ་སྐྱུར་བའི་རོ་དང་བྲལ་བས།
ཁྱེད་རང་འཐུང་རྒྱུན་རིང་ལ་འགྲོ་སོང་ཆེ།
ཁྱེད་ལ་ངོ་ཚ་འདོར་ཞིང་སྐད་ཆ་ཤོད་པའི་ནུས་པ་དང་ ལྡན་པས་ཁྱེད་ཀྱིས་རྣམ་གྲངས་ལེན་ལ་རྟགས་ཐམ་ འགོད་པའི་དཔལ་ཡོན་རྒྱས།
སྦི་རག་ཡ།
ཁྱེད་ནི་ལྐོག་རྔན་གྱི་དཔང་པོ་དང་།
གོ་གནས་ཀྱི་སྐས་འཛེགས་རེད།
ཁྱེད་ཀྱི་དྲི་མ་བྲལ་བའི་ཆང་ཐིག་རེ་རེའི་ནང་དུ།
ཞིང་འབྲོག་རྣམས་ཀྱི་འཕེལ་གྲིབ་འཁོད་ཡོད་ལ།
ཁྱེད་ཀྱི་གཟེགས་མ་འབར་བའི་རྡུལ་ཕྲན་རེ་རེའི་ནང་དུ།
རྒྱ་ཆེའི་ལས་བྱེད་རྣམས་ཀྱི་དར་རྒུད་འདུས་ཡོད།
ཁྱེད་མེད་ན།
སྙིང་ཉེ་བའི་མཛེས་མར་བརྩེ་དུངས་ཇི་ལྟར་སྟོན།
ཁྱེད་མེད་ན།
ཆེས་མཐོ་བའི་དཔོན་པོར་འཇོན་ཐང་ཇི་ལྟར་ངོམས།
ཁྱེད་མེད་ན།
ཡུན་རིང་རྒྱུན་འཁྱོངས་བྱས་པའི་བཟའ་ཟླ་གཡུགས་མི་ཐུབ་ལ་
ཕྲུ་གུའི་མདུན་ལམ་དང་སྤྱི་ཚོགས་ཀྱི་ཀུན་སྤྱོད་དོར་ག་ལ་ཐུབ།
གཅིག་བྱས་ན།
ཁྱེད་ཀྱི་ཆུ་ཤེལ་དང་འདྲ་བའི་ཤེལ་བུམ་ལའང་།
གད་སྙིགས་ཀྱི་སྦག་བཙོག་དང་། ར་གཟི་བའི་སྐྱུག་པ།
སྒྱིད་ངན་གྱི་གཅིན་པ། རང་བྱུང་གི་ཐལ་རྡུལ་སོགས་མཆིས་ཀྱང་སྲིད་མོས།
ཡིན་ནའང་།

ཁྱེད་ལ་ཞེན་ཆགས་ཀྱི་རང་བཞིན་དང་དད་ལངས་སུ་ཤོར་བའི་ནུས་པ་ལྡན་པས། དུས་གསུམ་ཆང་ལ་དགའ་བའི་མི་རྣམས་ཁྱེད་གཅོད་དུ་ འཇུག་པའི་བློ་སྟོབས་ནི་ནམ་ཡང་མ་མཆིས་ལ། དོན་དངོས་ཀྱི་སྣ་བསུན་མང་པོས་ཁྱེད་ལན་བརྒྱར་བཅད་ཀྱང་ཆོད་པའི་ངེས་པ་ནི་དེ་བས་ཀྱང་ག་ལ་ཡོད།
རྒྱུ་མཚན་ནི།
ཁྱེད་ཀྱི་ཕན་ནུས་དོན་དངོས་དང་སྦྲེལ་ཞིང་།
ཁྱེད་ཀྱི་འཇོན་ནུས་བྱ་བ་མང་པོར་འདྲེས་ཡོད་པའི་ཕྱིར།
ཁྱེད་ཀྱི་དོན་དངོས་ཀྱི་ཕན་ནུས་མང་པོས། མི་མང་པོར་ཁེ་སང་དང་ཕན་ཡོན་མང་པོ་གནང་ཡོད་ལ། ཁྱེད་ཀྱི་དོན་དངོས་ཀྱི་དོན་རྐྱེན་མང་པོས། མི་མང་པོའི་སྲོག་དང་འཚོ་བར་འཇིགས་པ་སྤྲད།
གསན་བྱུང་ངམ། སྦི་རག་ལགས།
སྦི་རག་མི་འཐུང་བའི་གཞོན་ནུ་ཞིག་གི་དྲི་བ་འདི་དག་གསན་པ་ཨེ་བྱུང་།
རྒྱལ་ཁབ་ཕྱག་ལས་འཐུས་ཤོར་སོང་ན་ཇི་ལྟར་བྱ།
ཁྱིམ་ཚང་འཆམ་མཐུན་འཐོར་གཤིག་སོང་ན་ཇི་ལྟར་བྱ།
ཕྲུ་གུའི་མདུན་ལམ་ཐལ་བར་འདྲེས་ན་ཇི་ལྟར་བྱ།
ཕ་མའི་སྤྱན་གཉིས་མཆི་མས་བསླན་ན་ཇི་ལྟར་བྱ།
བཟའ་ཟླ་མཚན་གང་གཅིག་པུར་ལུས་ན་ཇི་ལྟར་བྱ།
རྩེར་གསོན་ལག་རྩལ་སྟོང་ཟད་སོང་ན་ཇི་ལྟར་བྱ།
ལགས་སོ། སྦི་རག་ལགས།
ཁྱེད་ཀྱི་རྙོགས་ཞིང་འཛིང་ལ་ཟང་ཟིང་ཆེ་བའི་ དོན་དངོས་ལས་བྱུང་བའི་ལན་དེ་དག་ང་ཚོའི་སེམས་སུ་རྡོ་ལ་རི་མོ་བརྐོས་པ་ལྟར་བཟུང་ཡོད།
ངོ་མ། འཇོན་ནུས་ཤིན་ཏུ་ཆེ་བའི་སྦི་རག་གིས་ཆུ་འཁོལ་གི་ཚབ་བྱེད་མི་ཐུབ་ལ།
རྙོགས་དྲའི་དྲི་དང་འགྲོགས་པའི་ཁེ་སང་གིས་རྒྱུན་རིང་བདེ་ཐང་གི་སྐོམ་པ་ག་ལ་གསོད། རྙེད་པར་དཀའ་བའི་མི་ལུས་ཀྱི་ཕུང་པོ་ལ། དུས་དང་མཐུན་པའི་བདེ་སྲུངས་གི་གོ་རྟོགས་མ་ལྡན་ན། བདེ་ཐང་གི་འཕར་རྩ་ལྡིངས་མི་སྲིད་ལ། མདུན་སྐྱོད་གི་གོམ་པ་སྤོ་མི་ཐུབ། བདེ་སྐྱིད་ཀྱི་འཚོ་བ་ནི་དེ་བས་ཀྱང་ངོ་།
ཀྭ་ཡེ། སྦི་རག་ལགས།
ཁྱེད་ཀྱི་ལང་ལོང་འཕྱུར་བའི་སྦུ་བ་དང་།
གང་བྱུང་དུ་གཡུགས་པའི་ཤེལ་བུམ་ལས།
ང་ཚོ་སྟ། བོད་གངས་ཅན་གྱི་མི་རབས་གསར་པའི་འཐུང་ཤུགས་མཚོན་པ་དང་།
ཁྱེད་ཀྱི་གང་བྱུང་དུ་བཙུགས་པའི་ཨར་ཁང་དང་། ཟང་ཟིང་ཆེ་བའི་ནང་མ་ལས།
བོད་གངས་ཅན་གྱི་མི་རབས་གསར་པའི་ཕུགས་བསམ་མངོན་འདུག
རྩོད་རྙོགས། འཁྲུགས་རྩོད། མིག་སེར། ཞེ་སྡང་།
ང་ཚོའི་དུས་རབས་འདིར་གཏན་ནས་འཇུག་ཡུལ་མེད།
ལེ་ལོ། རྗེས་ལུས། ཀླ་ཀློ སྤྱོད་ངན།
ང་ཚོའི་དུས་རབས་འདིར་གནས་ཡུལ་གཏན་ནས་མེད།
སྦི་རག་ཡ་སྦི་རག

ང་ཚོའི་སེམས་ནི་ཁྱེད་ཀྱི་འགྲོས་དང་བསྟུན་ནས་གཡོ་བ་དང་། ང་ཚོའི་ལུས་ཀྱང་ཁྱེད་ཀྱི་རྒྱུན་དང་འགྲོགས་ནས་ཉམས།
མ་འོངས་པའི་ལམ་ཁར། འབད་བརྩོན་སྔར་ལས་ཇེ་ཆེར་དགོས་ཀྱང་།
བོད་ཀྱི་གཞོན་ནུ་རྣམས་བརྩོན་པའི་སེམས་ཤུགས་བྲལ་ཞིང་།
ཁོང་ཚོས་རང་རེའི་མི་རིགས་འདིར། བཏུང་ཆ་ཡི་ལམ་བུ་གསར་པ་ཞིག་འབྱེད་ཐུབ་ངེས་ཡིན།
ལྟོས་དང་། གྲལ་འགྲིགས་པའི་ཆང་རྐྱལ་འདི་དག་ནི། བོད་གངས་ཅན་གྱི་མི་རབས་གསར་པ་རེད།
ཉོན་དང་། བགྲོད་ཉམས་པའི་གོམ་སྒྲ་འདི་ནི། བོད་གངས་ཅན་གྱི་གཞོན་ནུའི་གོམ་བགྲོད་རེད།
ནག་ཁུང་གི་ནང་མ། ཁྲེལ་མེད་ཀྱི་རྨོ་བོ།
ཕྱི་རྫིགས་གི་ཨར་ཁང་། ལས་མེད་ཀྱི་བུ་མོ།
སྦི་རག་གི་ཁྲོམ་རྭ་ལ་ཡལ་བ་མེད་ཅིང་།
སྦི་རག་གི་ཚོང་ཤག་ལ་ཉམས་པ་མེད།
འདི་ནི། བོད་གངས་ཅན་གྱི་གཞོན་ནུ་རྣམས་ཀྱི་སྦ་ཁུག་ལས་བྱུང་བའི་སྦི་རག་གི་རྩིག་པ་རེད།
འདི་ནི་བོད་གངས་ཅན་གྱི་གཞོན་ནུ་རྣམས་ཀྱི་ཧུར་བརྩོན་ལས་བྱུང་བའི་སྦི་རག་གི་ རྦབ་ཆུ་རེད།

http://www.tibetsheep.com/archives/275

Leave a Comment

Your email address will not be published. Required fields are marked *

*